Кыргыз Республикасынын Судьялар кеңеши Судьялар кеңешинин мүчөсү, Бишкек шаардык сотунун төрагасы Абыкеев Талайбек Капаровичтин атасы — Абыкеев Капар Сатыбалдиевич мезгилсиз дүйнө салгандыгына байланыштуу терең кайгыруу менен көңүл айтат.

Абыкеев Капар Сатыбалдиевич 1952-жылдын 18-февралында Талас облусунун Кара-Суу айылында туулган. Ошол жерде өсүп-өнүп, өмүрүнүн негизги бөлүгүн эмгекке жана жаш муундарды окутуп-тарбиялоого арнаган.

Кесиби боюнча эмгек жолун 1974-жылы Талас районундагы №6 СПТУда өндүрүштүк окутуунун чебери болуп баштаган. Кийинки жылдары кесиптик окуу жайларда ар кандай жооптуу кызматтарда, анын ичинде жетекчилик кызматтарда иштеп, билим берүү тармагына олуттуу салым кошкон.

1986–1988-жылдары Афганистан Республикасында кесиптик окуу жайларда кеңешчи болуп иштеп, эл аралык деңгээлде тажрыйба топтогон.

Эмгек жолунун акыркы жылдарында Талас районунун Ак-Сай айылындагы №110 кесиптик лицейинин директору кызматын аркалап, 2023-жылы ардактуу эс алууга чыккан.

Узак жылдык ак ниет эмгеги үчүн бир катар мамлекеттик жана ведомстволук   сыйлыктар менен сыйланган, анын ичинде:

• «СССРдин профтехбилим берүүсүнүн отличниги» төш белгиси;


• 1988-жылы — «Благодарный Афганский народ» медалы;


• 1999-жылы — Кыргыз Республикасынын Эмгек жана социалдык жактан коргоо министрлигине караштуу кесиптик-техникалык билим берүү боюнча Башкармалыктын грамотасы;


• 2005-жылы — Кыргыз Республикасынын Эмгек жана социалдык жактан коргоо министрлигинин Ардак грамотасы;


• 2014-жылы — Россиялык Афганистан ардагерлер союзунун «Орден за заслуги» ордени жана башка көптөгөн сыйлыктар.

Кыргыз Республикасынын Судьялар кеңеши үй-бүлөсүнө, туугандарына жана жакындарына терең кайгыруу менен көңүл айтат.