Кыргыз Республикасынын Судьялар кеңеши сот тутумунун ардагери Уметов Бейшебай Уметович дүйнө салгандыгына байланыштуу туугандарына жана жакындарына терең кайгыруу менен көңүл айтат.
2024-жылдын 8-апрелинде узакка созулган оорудан соң Кыргыз Республикасынын сот тутумунун ардагери Уметов Бейшебай Уметович дүйнө салды.
Бейшебай Уметович 1938-жылы 5-майда Ысык-Көл облусунун Ак-Суу районунун Ичке-Жергез айылында туулган. Орто мектепти 1956-жылы аяктап, Кыргыз Мамлекеттик Университетинин юридика факультетине тапшырып, аны 1962-жылы аяктаган. Ошол жылы Ак-Талаа райондук прокуратурасында, кийин Алай районуна которулуп, прокуратурада тергөөчү болуп иштеген.
1968-жылдан 1981-жылга чейин Ош, Ысык-Көл облустук прокуратурасында прокурордун жардамчысы кызматын аркалаган.
1981-жылы Ысык-Көл облустук сотунун төрагасынын орун басарлыгына шайланган.
Ал эми 1983-1985-жылдары облустук юстиция бөлүмүнүн башчысы, 1985-жылын кайрадан облустук соттун төрагасынын орун басары болгон.
1990-жылдан 1999-жылга чейин Каракол шаардык сотунун төрагасы кызматында эмгек өтөгөн.
1999-жылы Ак-Суу райондук сотунун төрагасы болуп дайындалып, 2003-жылы ардактуу эс алууга чыккан.
Орду толгус оор жоготуунун азабы менен кайгы-муңун тең бөлүшүп, терең кайгыруу менен көңүл айтабыз.